Reonald HYSENLLARI

Ky është  vendi i çudirave të mëdha, aq sa ia kalon dhe  ‘’ Elizës tek bota e çudirave”.  Koncensionizimi apo ajo fjalë  e bukur me plot ngjyra  Partneriteti  Publik Privat   (PPP ) ku çdo gjë këtu  jepet me koncesion, rruga, uji,  shëndetësia, arsimi, pasuritë natyrore, konçesion kudo konçesion.

Ligjin Nr.88/2014 PËR KONCESIONET DHE PARTNERITETIN PUBLIK PRIVAT

“Koncesion”  , “Koncesioni i punëve publike” ,  “Koncesioni i shërbimeve publike” “Koncesion i përzierë”  amendimet që i bëhen këtij ligji janë thjesht dhe vetëm favorizim i klientelizmit.

Për  atë që dua të flas  është  ndërtimi  i rrugës së ashtuquajtur  ‘Rruga  e kombit’ . Projekti në letër dhe  zbatimi në  terren  e reduktoi  gjatësinë nga 170 km  që duhet të ndërtohej  në  60 Km, dhe një  investim  që  i kushtoi  shqiptarëve   gati 1.2 miliard euro, shumë për një  vend të vogël si ne.  Akuza për afera korruptive për vjedhje marramendëse , dhe sot që  flasim as kush nuk mban përgjegjesi.  Por një gjë të paktën e dimë,  është një investim  në infrasturukturë  e bërë nga shteti shqiptar, nga taksapaguesit shqiptarë.  Qeveria shqiptare  dje mendoi  ta ndërtonte  të  gjithë segmentin me buxhetin e shtetit  duke  kontraktuar   shoqërinë  ‘Bechtel- Enka’ për ndërtimin  jo të 170 Km rrugë,  por të 60 Km të autostradës  duke lënë  segmente dhe pjesë të pa ndërtuara.  Sot sipas  qeverisë  shqiptare   të ardhurat e  buxhetit nuk mbulojnë  dot kostot e mirëmbajties së rrugës prandaj   me  30 Maj  2016 Komisioni i Vlerësimi të Ofertave në Ministrinë  e Transportit hapi garën për  koncensionin e radhës kjo  një  vjedhje e dytë për atë rrugë. Madje  sipas një klauzole në kontratë kompania  rimbursohet  për 13 vite por me para të buxhetit,  edhe pse shqiptaret paguajnë taska për  automjetet e tyre më shumë se në rajon, gati 150 milion euro mblidhet nga taksa e qarkullimit. Ajo që u serviret  shqiptarëve  është   fakti se  të ardhuar  e buxhetit  nuk mbulojnë dot mirëmbajtien  e rrugës  dhe ndërtimin e pjesëve të mbetura përfshi dhe  urat. Kjo  shumë për të qeshur . Kësaj i  thonë të ndërtosh një hotel   nga themelet deri  tek  përfundimi,  dhe oborrin e jashtëm dhe  arredimin ta japim me koncesion sepse lekët mbaruan dhe  fitimin për 35 vite ta marrë  koncesionari.  

Unë kështu nuk jam dakort.

Jam dakort nëse më kthehet  i  gjithe investimi i  hotelit   apo  ato 1,2  miliard Euro në buxhetin e shtetit dhe pastaj të diskutojmë  për  koncesionin  dhe me kushtin  që koncesionari  të  riasfaltojë rrugën e vjetër që unë  më pas të  zgjedh të paguaj tarifën e  koncesionarit për të kaluar tunelin e Kalimashit,  apo të kaloj në  rrugën  më të gjatë  por të asfaltuar.  Nëse ecim me këtë llogjikë  nesër do japim me konçesion dhe  rrugën Tiranë -  Elbasan, Tiranë-Durrës, Durrës-Lushnjë-Fier, Fier-Vlorë, Levan-Tepelenë.  etj.

Koncesioni  artikulohet nga qeveria shqiptare vetëm  atëherë  kur është kryer  dhe ka përfunduar investimi, idiotësi komplet dhe e papranueshme.   Pse nuk jepen me koncesione rrugët që janë  në projekt  zbatimi   RRUGA QUKËS-QAFË PLLOCË, gjatësia – 40.3 km, Kostoja – 152 mln dollarë,  Rruga e Arbrit  27km  që akoma nuk dihet vlera e sakte flitet diku  deri ne  200 apo 300 ml euro.

Këtu qëllimi në vetvete nuk është të ndërtohet por të përfitohet dhe përfitimi me i madh është koncensionizimi  sepse aty vjedhja ështe dy herë,  dhe ne paguajmë dy herë një për qeverinë  dhe një për  zotërinë (koncesionari), një herë per ligjin dhe një herë për maliqin.